今季NBA季後賽首圈被譽為近年最好睇嘅一季，場場都打餐死；周四上演嘅3場Game 6全部由賽前落後2:3嘅球隊贏出，已確保呢一輪賽事最少會有3場「搶7」大戰。其中有機「黑7」嘅灰熊，因為雷霆有杜蘭特（KD）回勇，主場以84:104輸波，仲未出到線。
KD狂轟36分信得過
近幾場表現平平嘅KD，賽前俾奧克拉荷馬報章頭條寸佢係「Mr. Unreliable」（不可靠先生）。貴為常規賽得分王嘅佢俾人咁激一激，今場即刻上晒力，對住出名防守勁嘅灰熊都如入無人之境，入夠36分，幫雷霆大炒對手20分。KD成功用行動去塞住批評者把口，大膽寸佢嘅報章編輯，事後就梗係要出嚟道歉啦。
不過，KD賽後接受訪問時就懶理批評，只係話：「今場波許勝不許敗，畀到我哋成班球員好大嘅動力；去到第7場我哋要打得更加好。」3年前嘅西岸準決賽，雷霆就喺第7場贏波踢灰熊出局，唔知今次會唔會歷史重演呢？
PG衝入場或要停賽
至於溜馬就贏鷹隊95:88，暫時逃過「黑8」一劫。老大哥大衛韋斯繼續有好表現，撐住隊波，但係希拔就連續兩場食白果。另外，第2節尾段佐治希爾同對方球員喺場上互有推撞，喺後備席嘅保羅佐治（PG）想衝入場幫拖，雖然好快俾助教㩒住，但好明顯成個人入咗場內，違反聯盟條例，有可能被秋後算賬，下場要停賽。不過溜馬教練禾高就話未驚過，佢咁老定可能仲有另一個原因：鷹隊史上8次作客打第7場全部輸晒，就算溜馬真係冇咗PG，都應該可以順利晉級啩。同日勇士亦上演絕地反擊，以100:99險勝快艇，一如外界之前所料，要打到最後1場先可以定勝負。