人逢喜事就話精神爽啫，若然惹上官非，精神就可能委靡啲喇。好似大劉劉鑾雄咁，平日都幾青靚白淨、鬚根都冇多兩條吖，但唔知係咪因為早排喺澳門被控告行賄罪成，搞到做乜嘢都冇心情，佢噚日喺飯堂灣仔福臨門現身時，罕有地滿面鬚根，睇落唔太精神喎，莫非因為諗緊係咪上訴搞到心事重重？
話說大劉噚日晏晝約1點鐘，獨自坐住48號車牌嘅平治去到福臨門，只見戴住眼鏡嘅大劉滿面鬚根，仲帶點滄桑㖭。當被問到會唔會趁最後限期遞交上訴書時，鬚根look大劉充耳不聞，一支箭直入酒樓。
甘比醒神現身
查實喺大劉嚟之前，佢嘅知己甘比同埋媽咪、仔女一齊坐住掛有「1 L0VE U」車牌嘅平治先到埗。身穿綠色套裝、襯埋綠色Herm箢s手袋嘅甘比，雖然戴住黑超，但都睇得出好鬼醒神。甘比落車後拖住低頭避鏡頭嘅囡囡劉秀樺匆匆步入飯堂，甘比媽咪就抱住孫仔。大劉媽咪同胞妹劉玉珍亦喺甘比入去後到咗福臨門。
最終大劉一家樂融融，食晏食到2點15分，之後一齊落樓分別坐車走人。甘比抱住瞓着咗嘅囝囝上車，顧大又要顧細嘅大劉，好有風度咁睇住所有人上晒車，最後自己先上車離開。
八方噚日亦喺福臨門門口見到中港照相器材主席孫大倫同埋老婆、細仔孫道熙（Ryan）同新抱林珊亭（Sandee），孫大倫好高興咁話：「今日係我細仔生日！」
mailto:[email protected]