蔡少芬快三歲的長女楚兒,跟五歲的美心妹妹楊鎧凝一樣人見人愛,兩位星級B晒Cute晒萌,為Ada的童裝品牌童夢工場省靚招牌。
蔡少芬(Ada)早前跟教友曾國銘等合作大搞童裝品牌童夢工場,兩女之母的Ada最近孖快三歲的長女張楚兒作母女檔代言人,並拍攝廣告。
兩母女在鏡頭前溫馨爆燈,楚兒完全遺傳了父母的優良細胞,既有媽咪的靚,甚會擺甫士,也有爹哋張晉的活力,拍攝期間精力充沛,Ada忍不住大讚楚兒有天份當小模特兒。
表情甫士專賭氣
Ada認為母親跟女兒總是最親,她昨日在電話中說:「我做咗媽咪好有呢個感覺,無論髮型同衣着,我好鍾意同囡囡孖公仔,囡囡好似係我個copy,所以我同公司提議大搞母女裝系列。」她不時帶楚兒出席活動,囡囡對鏡頭並不陌生,拍攝時跟母親不停互動,Ada說:「楚兒好有自己性格,我叫佢笑,佢會扮cool,着住淑女裙又扯高裙仔,我要一路影、一路叫住佢,我要同佢講公主唔係咁,囡囡永遠唔肯停低,好彩有老公(張晉)喺現場幫手睇住。」
母親節女兒生日
本月11日是母親節,Ada指當日正是楚兒三歲牛一,她說:「我會同北京劇組請假返嚟同佢切蛋糕慶祝,呢一日咁啱又係母親節。」Ada表示楚兒學校稍後有母親節慶祝活動,母女會上台唱歌助興,她說:「我呢排都喺北京拍嘢,冇時間同囡囡一齊綵排。」
此外,張晉日前接受商台訪問時,談到與Ada相戀後常被指女尊男卑,他坦言起初很介意,其後慢慢習慣,最近奪金像獎最佳男配角,心態卻沒有太大改變。他表示多年來都是靠共同信仰維繫,問可會生第三個小朋友?他說:「養兩個已夠累,暫時不考慮。」
美心妹妹萌送吻
現年五歲童星楊鎧凝曾參與不少廣告及戲劇演出,三歲已經出道,早前的美心妹妹可愛look令觀眾印象深刻。昨日楊鎧凝由父母陪同下,到尖沙嘴出席蔡少芬的童夢工場活動,擔任小模特兒的她跟一班小朋友手拖手宣傳品牌,面對鏡頭楊鎧凝表現自然,還懂得自動自覺擺出不同的甫士,又大送飛吻賣萌,蔡少芬則因身在外地未能出席。
母親節將至,問楊鎧凝小妹妹送上甚麼禮物給媽媽,她即時獻唱兩句:「我愛媽媽,媽媽真偉大。」楊母表示屆時會聯同一歲多的細佬一家四口吃飯慶祝,又謂囡囡在佛誕日會接拍一個廣告,到時會玩樂器上陣。
採訪:比華利、卓寶花