藝人「阿嬌」鍾欣潼舊年貪平用咗差唔不多成千萬買入嘅長沙灣一號．西九龍「面壁樓」，由於屋苑租盤越來越多，據講佢個單位要同人鬥平先租得出，本來月租叫價3萬銀，最後減到落2.45萬銀先租出，減咗足足18%！
區內代理話，阿嬌持有嘅一號．西九龍1座低層C室，建築面積1,158方呎，實用面積864方呎，未收樓已放盤，本來月租叫緊3萬銀，但估不到上月收樓後屋苑租盤越來越多，平過佢嘅單位又大把，所以唔劈租唔得。有風話個單位上月底突然減到落2.45萬銀。呢個單位阿嬌購入價約979萬元，扣埋每月大約2,500蚊管理費，實際租金回報率得2.7厘左右。
屋苑租務唔算旺，入咗伙都有超過一個月，成交都係得15宗左右，但就越租越平。好似阿嬌同座樓上一個高層C室單位，近日就租咗2.3萬銀，建築呎租廿蚊都冇，創屋苑新低。
一號．西九龍係超人近年繼九龍塘珏堡「天台冇圍欄」後又一驚世巨獻，因為景觀面璧，發展商採用嶄新手法，窗戶改用磨砂玻璃，出面完全望唔到入嚟，夠晒私隱；價值過百萬嘅窗台又長到可以打保齡，唔知阿嬌收樓時有冇嚇一跳！