【澳門直擊】被質疑為澳門維穩騷的「5.1黑沙海灘迎夏日演唱會」，昨午在一片爭議聲中舉行，之前謝安琪、張智霖、RubberBand、官恩娜和周柏豪等歌手相繼表態辭演，換上杜德偉、蔚雨芯、狄易達、HotCha、天堂鳥、FAITH等充撐場面，眾女更落台玩濕身水戰搞氣氛，但提到政治卻全部歌手都封嘴，表現忌諱。
點解唔問議員？
據知，今次參與的歌手都有收取歌酬，魔鬼胸蔚雨芯着腰間透視裙出場，陳蕊蕊和張惠雅（Regen）都穿短裙騷腿，蕊蕊更露出黑色打底褲，眾女又落台和觀眾濕身玩遊戲，表現落力。對於被質疑為維穩騷？Regen坦言：「我有聽講過，但我純粹愛跳舞想表演。」
HotCha的Crystal則避忌說：「公司唔想我哋同政治掛鈎，自己怕fans鬧會注意網上言辭。」問會否效法RB和Mr.捐出維穩歌酬？她們說：「冇諗過，但如果有收錢，大家又想我哋捐冇所謂。」
魔鬼胸蔚雨芯和狄易達同樣表示不知有否歌酬，對於維穩騷被指跟遊行搶客，達仔直言：「如果市民要去遊行，有冇騷都會去，澳門人唔會咁蠢嘅。我好戥啲artist慘，有政治嘢就嚟問我哋，但又唔問議員，佢哋開會又拉布又轉珠又睇AV。」問魔鬼胸怕被指支持澳門政府嗎？她大擦負責製作的新城高層朱明銳鞋說：「唔會，我支持銳哥，因為呢個騷係新城搞嘅，我唔會扼殺自己表演機會。」
唔會特別捐錢
擔任壓軸的杜德偉否認轉軚演出：「唔係唔做又做，中間有工作安排，後嚟參加到咪嚟。音樂同政治可以分開，歌手只係做好工作，香港表演機會唔多，唔顧慮其他情況，想多啲同歌迷接觸。」問會否捐歌酬？他說：「早幾年做嘢每個月都捐啲，唔會因某一次而捐。」
採訪：王連連
攝影：仇志德