早前宣佈趕做馬年新娘，會喺年底同「謎網」行政總裁林雨陽拉埋天窗嘅人民力量主席袁彌明Erica，雖然喺南區區議會海怡西補選落敗，但冇因此棄守海怡，噚日一班海怡居民參與公民黨發起嘅遊行、反對商場變outlet，待嫁姑娘Erica亦有參與，邊遊行邊攞住寫有「唔好『加』」嘅紙牌，查實佢係叫業主唔好向商戶加租，當然唔係叫人唔好「嫁」。啱啱放完假兼獲男友求婚嘅Erica，噚日特別容光煥發，唔少居民亦不時同呢位準新娘打招呼。唔知佢哋期唔期望Erica東山再起，下屆區議會選舉再喺海怡西作戰，同新民黨小花區議員再決一高下？