老友C係常平通，經常在常平出入，成日去常平做乜，打波喎，做老友嘅，唯有信住先。但近期又唔見佢去東莞打波咯喎，問佢點解，佢話打得多，膝頭、手臂以及條腰都有痠痛問題，要休息一輪。好吖，前幾日佢又走咗去常平食晚飯，下午五點去，食完飯就返嚟。次日碰到佢，佢話：「市面死寂，我與朋友到一間相熟酒店食飯，食咗一個鐘頭，其間只有我地一枱人，與幾個月前逼爆嘅盛況，完全唔同。侍應問我過唔過夜，房租平時收三百，現在收一百五十。我話咪搞嘞，食完飯就搭車走。」
聽佢講完古仔，睇報紙標題：「掃黃重挫經濟 東莞變空城」，內云今年第一季東莞GDP有1182億元人民幣，按年增長7.3%，增幅在廣東省各縣市中排第十七，比去年同期下跌1.3個百分點。
東莞如此清淡，當然與中央下令大力掃黃有關，東莞呢個「世界工廠」，又曾係「世界性都」，興旺一時，如今工廠出口不景，黃色生產鏈全面斷絕，連帶所及，十幾二十萬人生計受影響。老友C嘅朋友賓架K聽聞呢啲消息已有一段時間，開始有啲憂慮，因為東莞啲酒店、食肆、工廠，唔多唔少總會有銀行貸款，酒店冇人住，點有現金流償還債務呀，一旦出現違約（default）事件，就會引發連鎖反應。賓架K要早作準備，立即檢視銀行嘅東莞exposure。此乃賓架本能反應，知你生意唔好，現金流漸減之時，就會部署收遮，唔係繼續支持你呀！以前有一個台灣地下錢莊，恃住大把現金，從事一項大型投資，用咗現金二十億之後，仍然未埋到尾，於是走去銀行借錢，同賓架講：「我投資二十億，現在要借多五億嚟完成大計，可以按晒啲磚頭俾你。」銀行一口拒絕，呢位人士大怒，罵某銀行太過保守，賓架同佢講：「你有二十億現金之時，若存在我銀行作抵押用，又抵押埋即將興建嘅項目，我起碼借三十億俾你，現在明知你已經乾塘，仲借錢俾你？我要你啲磚頭做乜喎？」（按：此乃真事，略作修改，以免影射。）今天之賓架，若有東莞貸款在簿，唔準備收遮部署，攞嚟講啫。