38歲的梁詠琪徹頭徹尾是一名「港星」，贊育醫院出世、瑪利諾讀書、理工大學畢業，在香港土生土長，生仔大事，想當然地Made in Hong Kong，「香港地方細，大家都用放大鏡去望住你，但係，都令你要力求完美。」香港最欠缺的是空間，但人和事、感情，還有近20年的女星生活，都令她熱愛香港。Gigi近日因盆骨歪暫停造人，但她那港女、港星、港太、港媽的人生故事，應該會一直「港」下去。
撰文：林妙萍
攝影：周樂恒
造型：顏英儀
化妝：Andy Leung of ND & Co.
髮型：Domanic Tao of Pi4.com.hk
「你響邊度，邊度就係我家！」
「我嚟你生命中，唔係要成為你嘅絆腳石，而係令你生活得更加好！」
不是韓劇的愛情對白，每一句都令任何女人聽到頭暈暈，梁詠琪提到西班牙籍老公Sergio和自己之間的日常對話，真的如同吃了甜在心饅頭，「佢嘅答案，係好攞命，同埋好有力量。」2011年10月3日，梁詠琪在西班牙Ibiza小島和Sergio結婚，從此成雙成對公開恩愛，任影唔嬲。
任由子女食泥
原定全速開動生BB，Gigi因脊椎彎曲、盆骨歪，要停止造人兩個月，醫好脊骨再算。出生時只有2公斤，媽媽將她和孖生弟弟湊到今日6呎高，母親的偉大艱苦，怎會不知，但仔未生，做媽咪的感覺十分模糊，「𠵱家我仲未明白嗰種掏心掏肺，畀最好嘅嘢佢，最好教育佢嘅嗰種想法，我仲未明白，𠵱家好期待，但到時可能我會好迷惘。」港童成為專有名詞，七八歲不懂刷牙、沖涼，自理能力極低，「我又唔怕喎，我唔怕自己變虎媽，個仔變港童；我唔緊張，想佢自己所有事都經歷，跌親都自已體驗，你要食泥咩？你咪食一次，你覺得唔好食，就唔會再食；而唔係唔知泥咩味，又永遠好想食咁。」兩人又會構思異想天開的育兒問題，如：未來兒子想娶艷星做太太、同性戀又如何，互相討論。
欣賞老公大愛
97年前，香港湧現移民潮，近年又出現逃出香港，搬到台灣、新加坡生活的新一浪。Gigi和老公生兒育女、未來人生規劃，沒特別想過離開這片土地，「我哋諗，香港唯一最欠缺係空間，其餘嘅都有。我最重要嘅家人都喺香港，老公都好明白，女人對家庭係特別需要，特別黐家，留喺香港生，生嘅過程會易啲過渡。」
梁詠琪一講老公收不到掣，結婚2.5周年也會慶祝，浪漫的男人，背後其實是一份大愛讓她很安心，「結婚後，好多事唔係一個人去面對，係team work。佢好有自信，有自信就唔會同人計較，佢嘅自信來自良好教育，來自有一個好正面嘅價值觀，有好愛佢嘅家人，有自信有勇氣去面對、去溝通，仲有唔同人計較嘅胸襟，好有大愛！」
新片《香港仔》，梁詠琪做回娛圈一分子，但片中是一名奀星女模，拚命在娛樂圈掙扎求存，反映了香港本土的娛圈生態，電影更成為烏甸尼開幕電影。 「我覺得自已近六、七年，可以響自己長大嘅地方，交出一套咁本土嘅電影，完全香港人故事，好開心。」投入認真宣傳程度，是Gigi影完add專輯，自費買回那3萬多Chloé去宣傳新片。
香港女星飯局
Gigi在片中要演搏命爭取演出機會的女星，真空飛釘、穿底褲上床、披血扮殭屍，最深刻卻是這一幕：女星飯局，Gigi演到動真火！「堅嬲！劇情講到陳輝虹叫我出去食飯，話介紹一個角色，但出去之後，原來係去飯局，有老細想我陪佢，嗰吓我覺得好侮辱，我係要表現得嬲，但我係真嬲，點解個社會對女性的要求咁高呢，你想我哋點呢？」
香港生活出名壓力大，小地方，甚麼事都被聚焦，Gigi反而覺得練就香港女星一套獨有的優勢和特質，「香港女星好識保養，好似周慧敏咁，真係冇變過，可能社會對我地要求高，地方又細，大家用放大鏡去望住你嘅情況，你就要力求完美，做得更加好。」美魔女就是如此練成的。「以前啲女星結婚生仔都秘秘密密，唔畀人知啦；𠵱家就沖完涼影張相，食完飯影張相咁，冇咗神秘感，但多咗親切感。」
更多精采時尚內容，盡在 http://add.appledaily.com。