人稱「無綫化妝間梁朝偉」、兼為《獎門人》系列御用化妝師的張家萬（Gary），前晚喺屋企因心臟病發猝逝，終年39歲。無綫企業傳訊部宣傳科副總監曾醒明，噚日喺電視城證實話：「Gary喺TVB服務咗就嚟有20年，佢係藝員形象科助理督導，我哋對佢嘅離世深感痛惜，事前亦都冇任何先兆，希望佢嘅家人節哀，我哋會為Gary嘅身後事提供協助。」
眾星紛表難過
胡杏兒噚日喺電視城話前晚知道Gary過身嘅事，希望佢一路好走，杏兒仲話：「佢嘅為人樂觀開心，識打扮又有型，而且鬼鬼哋咁，最難忘係當年拍《我的野蠻奶奶》時要化一個好特別嘅妝，但係佢化完後覺得唔滿意，同我講唔好意思。」金剛話初初知道呢個消息，以為係講笑：「係阮兆祥打畀Gary家姐求證先知道係真，好愕然同難以置信。」金剛話幾個《獎門人》主持人都係佢負責化妝，最後一次見面係喺一個月前大家去咗外地做嘢。
有好多佢生前合作過嘅藝員朋友，紛紛喺微博哀悼呢位好友，蔡少芬話心痛難過，願佢嘅家人堅強！事前仲同Gary有講有笑嘅黃心穎，亦都話同佢有太多有趣嘅回憶，希望佢喺天國繼續活得自由開心！三哥苗僑偉、蒙嘉慧、同鍾嘉欣亦都有留言，回憶與Gary相處往事。
撰文：馮仁昭
