英國駐港領事館喺星期二搞咗Queen's Birthday Party，慶祝前事頭婆、英女皇88歲大壽。英國駐港總領事吳若蘭當日黑衫配紅裙，賀壽look好搶鏡，現場唔知點解大大聲播勁歌，好多人覺得落咗disco。
除咗財爺鬍鬚曾等官員，現場最有睇頭貴賓係李嘉誠同佢大仔李澤鉅。英國佬走咗咁多年，李氏依然咁捧場，係因為李家喺英國有好多大生意，前事頭婆大壽，超人父子雙雙到賀，理所當然。
若蘭BB致辭時都令人豎起隻耳，事關佢主動提到2017年普選，話明縱使唔會有perfect model，但一個有認受性嘅特首先可以令香港保持國際地位，又提到中英聯合聲明提到香港要維持高度自治，事頭婆始終掛住香港嘅。