日前喺立法會一個委員會上因為反對全民退保，自由黨青年團主席李梓敬被80歲余婆婆用「仆街」及「x門」鬧爆，結果被網民封稱「西門梓」；而佢喺席間冇聽書，只顧用手機玩轉珠，亦被唔少人批評。西門梓前晚接受傳媒查詢時，自覺冇乜問題，一嚟覺得冇人share佢發言內容，覺得外界應用理據說服佢，二嚟認為自己冇攞公帑，在立法會玩轉珠，又如何？
嫻姐張國柱鬧爆
但好多人噚日繼續鬧爆呢位𡃁仔囂張。日前主持小組委員會嘅工聯會陳婉嫻，公開力撐余婆婆鬧得好，覺得西門梓反退保冇邏輯，仲話因此提點咗自由黨，教吓呢個𡃁仔唔好咁囂張，仲話西門梓應該反省吓。工黨張國柱亦撐八旬余婆婆火爆有理，不過喺立法會爆粗就始終唔多妥嘅！
唔知係咪見外界反響太大，西門梓噚日傍晚發聲明認衰。佢就喺會議期間打機嘅不禮貌行為「深感後悔」，向當日與會以及關心事件嘅香港市民致歉，強調以後會尊重每個會議，並虛心聆聽唔同意見以及接受各界批評。但西門梓重申，至今立場堅定地反對全民退休保障計劃。