政改首階段諮詢周六結束，各界陸續向特區政府交功課。成日有連珠妙語嘅立法會工業界代表林大輝，噚日向政制及內地事務局局長譚志源交方案，兩位gag王為政改聚首一堂。
既然係大師，大輝當然有高見。佢建議現任特首及立法會嘅「超級區議員」，直接入閘成準候選人，其他參選人就要獲八分一提委會委員支持先可入閘。
莫非為狼英度身訂做？大輝話正常人都想連任㗎啦，如果可以直接入閘，可以避免提前搞競選嘅唔公平。咁狼英下屆應唔應該入閘？大輝只話，可能人哋到時身體唔太好、又或者想買塊田耕吓呢。至於建議超級區議員直接選特首，皆因佢哋選民支持基礎夠多咁話。