識做香港人嘅,一定係咁做 - 曾志豪

識做香港人嘅,一定係咁做 - 曾志豪

廣東話真係好正,廣東潮語更加係G點所在,最能搔着癢處是也!
網民至愛兩句,一句係《低俗喜劇》嘅「識×(動詞)嘅,一定係×(動詞)驢仔×(名詞)」(你懂的)。表面句式,是一種正面肯定的讚美之詞,例如「識飲紅酒嘅一定飲法國紅酒」、「識睇波嘅一定睇C朗」,但網民是全世界最討厭正面歌頌偉大事物的懷疑主義者,所以這句潮語,很快便變成嘲笑別人出醜的形容詞。最抵死的是,這是一句反話,明讚實踩,你也無可奈何。例如你睇到旺角潮童着到比天堂鳥更天堂鳥,你便可以笑笑口講一句:「識着衫嘅一定係着hip hop波衫加粗金鏈!」知你者謂你口賤,不知你者謂你識貨也。
譬如面對阿爺屈機式的篩選政改方案,與其大叫「假普選可恥」,不如說「識揀嘅一定係揀高門檻全票制!」
面對高鐵事先張揚的「意外」爛尾驚訝事件,與其大喊「黑箱作業政府監管不力」,不如笑笑口「識賴嘅一定賴地硬同落黑雨」。
又或者再讚嘆一句「識起高鐵嘅一定喺香港起高鐵」,嗰種無王管任你玩嘅處境,下刪三百字,言猶未盡而大家明白。
我們身處一個隱惡揚善、被逼要求客觀公正冷靜報導新聞的畸形年代,當我們不敢明目張膽批判而要顧慮身後會有冷箭侵襲時,便要借助這種戲謔反話來開拓安全的批評空間。
黃子華嘅「係咁㗎啦」是一種無奈的接受,但我們進化了,訓練自己,這些無理現狀不只是一種客觀存在(係咁㗎啦),更是「理所當然」,「識睇嘅一定睇亞視。」
因為,「識做香港人嘅,一定係咁做。」