港大龍華街四座摩天學生宿舍嘅命名權，一直待價而沽，校方噚日公佈，總共收到一批捐款人共捐4.5億，會以學生宿舍命名回饋捐款人。先講第三座，叫立之學院，以剛離任嘅徐立之校長命名。捐款嚟自一群校友與友好，以示多謝佢12年嚟對港大貢獻，據知每人捐款數十萬至1,000萬元。
第一座叫信興學院，由已故「電飯煲大王」蒙民偉嘅信興教育及慈善基金捐贈；第二座叫志新學院，以新瑪德慈善基金創辦人、著名工業家孫志新命名，呢座宿舍由醫學院院長梁卓偉做舍監，去年底爆出高桌晚宴食茶記碟頭牛尾飯奇聞；第四座叫日新學院，係據捐款機構董氏基金會建議命名，其創辦人就係船王董浩雲，即董建華個爸爸。