龍昌（348）2012年尾獲海爾（1169）入股，平步青雲，家陣累計大升1.98倍。場內新鮮熱辣有「海爾概念」嘅仲有俊知（1300）。集團又食正祖國電訊設備龐大投資，得4倍PE，挨近6厘高息，博翻半番計，一啲唔過態。
俊知主打移動通嘅射頻同軸電纜、漏洩同軸電纜，同其他電子元件。前邊兩瓣，俊知祖國排名no.1，客戶係祖國龍頭中移動（941）、聯通（762）同中興（763）。
再講，俊知產品，兼且係電訊基建當中，不可或缺嘅重要元件，齋睇呢啲排頭，已經好吸引。
祖國4G剛啱上年尾揭開序幕，又去到上年尾，透過手機上網、手遊同視頻祖國用戶，激增84%，到2.47億人次，遊人數亦翻過半番到2.15億人次。而物聯網盛行，估計行業規模將由2009年1,715億銀人仔，大幅增加到2020年5萬億銀人仔！
高用量同極速需求，亦都增加電訊商擴容。再對落，自然產生對俊知產品龐大需求，俊知肥仔水。
俊知上年度純利增長24%到3.1億銀人仔，面對超好景，係咁意估集團今、明年度純利增長30%咁大把，到4億銀及5.3億銀人仔。就算連埋上年10月配股反映晒，明年度PE跌到4.1倍。又當俊知只係keep住上年派息，息率都講緊5厘8。
有海爾概念睇3.6元
場內近磅造電纜江南（1366），講緊7.5倍PE、造電子元件嘅昂納光（877）101倍PE，俊知平成截。又剛啱上星期，青島海爾投資，喺俊知權益曝光，揸咗俊知6%。上邊龍昌一獲海爾入股，股價放紙鳶，俊知有海爾牌頭，有啲遐想。
又噚日上邊龍頭股大郁，趁勢買俊知，現價（2.42元）博翻半番到3.6元計，PE仲未過雙位數。
錢雋
細價股專家
本欄逢周二、三、五刊出