自由黨青年團主席李梓敬，噚日出席立法會退休保障事宜小組委員會時，喺開會時當委員會主席工聯會陳婉嫻透明，高舉手機玩「轉珠」，被與會者影咗相，擺埋上網瘋傳。
被長者斥「仆街」
除咗被笑開會唔專心，李梓敬其後又因發表「我哋嘅父母應該由我哋去供養，唔係要求其他人去供養」言論，反對設立全民退休保障制度，俾關注長者權益大聯盟代表余婆婆爆粗面斥「仆街」，余婆婆老馬有火，話李梓敬唔應該假設所有人都必然有能力供養父母，又話如果唔係打工仔推工廠、推起樓，有錢佬邊可能發達？反問「你喺個X門拉出嚟就係咁大㗎嗱？」問佢第日衰咗點吖？喺坑渠拿飯食呀？話總唔信佢咁富貴。
李梓敬俾婆婆鬧完一輪，唔敢駁嘴，一直面露尷尬苦笑。