金鐘太古廣場嘅意大利餐廳Domani，開業六年，頭兩年捱吓捱吓，近兩年眼見生意大好，中午滿座不在話下，連晚上都夠客，先至令人驚奇。左丁山約人在金鐘食西餐，一定係選呢一間，貪佢侍應夠多、服務有效率，經理Stefano（意大利人）認得晒所有熟客，往往故意給人若干驚喜，故此啲常客特多，孫公未在政府退休前，孫太就經常在此與朋友吃午飯。
近年Domani特別多外籍食客，外籍客人比例比港麗酒店嘅8樓還要高，可能係因為餐廳不時從意大利請來不少地方名廚客串，介紹意大利地方名菜啩。意大利人就曾在此慶祝過150周年國慶、Verdi嘅二百歲誕辰（Giuseppe Verdi，1813-1901，著名歌劇作曲家），故此Domani嘅名字在歐洲人圈子傳開晒。當然，最重要嘅就係，呢間餐廳專用新鮮意大利食材，價錢唔算好貴，與8½、Grissini，Nicholini's相比，呢度可以慳番唔少。左丁山每到呢度，一定要以新鮮空運到港嘅意大利芝士配小番茄cherry tomato為頭盤，初時大鄉里，以為係一般Mozzarella（意大利南部水牛芝士），後來俾Stefano點醒，就知道係Stracciatella Cheese（呢個字好難串，不過上網打Domani cheese，就會見到呢個字），呢隻芝士亦係水牛芝士，來自意大利東南部（Puglia地區），非常清甜，來貨只能在雪櫃雪藏三四日，在Domani賣到出晒名。
可惜吖，業主太古集團據講有意進軍飲食業，Domani租約在五月中期滿，太古堅決要收回自用。太古在金鐘有一間六星級酒店Upper House，酒店內有一間紐約式餐廳，生意非常好，或者因此引起酒店公司對經營餐廳嘅興趣，要Domani離開，相信會在原址開辦一間更加高檔昂貴嘅西餐廳。在香港租舖經營食肆往往遇上呢類令人沮喪嘅事，努力營運幾年，名氣漸響，生意轉虧為盈之後，業主就來收舖。5月18日就係Domani最後一天，可惜也。