熱火前鋒勒邦占士，對住偶像都冇面畀！周一NBA季後賽東岸首圈，熱火憑勒邦占士攻入31分，作客109:98輕取山貓，以場數4:0淘汰對手，成為首支晉級次圈嘅球隊；占士賽後就同偶像兼山貓班主米高佐敦擁抱，希望MJ大人有大量啦！
快艇班主史達寧涉種族歧視嘅事件，搞到成個聯盟都鬧哄哄，熱火眾將賽前都圍圈拋低練習球衣，以示抗議；講番場波，熱火賽前揸住3場勝仗喺手，晉級只係時間問題；不過第3節就虛驚一場，「大帝」勒邦占士一次上籃，俾山貓前鋒比約保撞傷大腿，一度離場治療，好彩佢體格天生異稟，休息一陣就落番場，仲協助球隊打出一段11:2嘅攻勢，完第3節拉開84:71，最後亦順利以11分贏波，成為首支晉級季後賽次圈嘅球隊。
K獲加領軍再起「蜂」
今場攻入31分嘅大帝，曾經喺第3戰一次快攻，先望MJ一眼然後大力入樽，賽後被炮轟對波神不敬；呢次佢就好識做，完場後第一時間走到MJ面前同佢擁抱，勒邦占士仲話：「我好尊敬MJ，我向佢表示山貓今季有一個唔錯嘅球季，球員亦都不斷進步；MJ都回應話祝我健康。」由於同線嘅速龍對網隊仲打成2:2，起碼到星期五先分到勝負，變相熱火幾乎有成個禮拜休息，真係着數到暈。
山貓出局，亦代表呢隊波完成歷史使命，事關下季開始，球隊將會用番黃蜂呢個名；來季嘅黃蜂以控衞K獲加為首，前景都算樂觀，教練基福特亦點名稱讚：「K獲加展示自己面對聯盟最佳球隊都毫無懼色，今季係精采嘅一季，己隊都祝賀佢成長。」
