3年之後又3年，3年之後又3年，10年都嚟緊頭啦，雲格！自從2004年捧過英超後，阿仙奴近10年不斷重覆劇情，季初話要爭標，但季中死火，到季尾又翻生，保住前4名。今季亦唔例外，兵工廠周一以3:0大勝紐卡素，嚟緊贏多場又可以鎖定前4，複製近幾季嘅結局。
輕取紐記 贏多場搞掂
周一場英超，阿仙奴壓住紐卡素嚟踢，中堅哥斯尼26分鐘開紀錄，之後奧斯爾喺42分鐘執雞，射入佢喺2014年嘅首個英超入波。奧斯爾下半場仲助攻基奧特埋齋，阿仙奴主場大勝3:0，錄得3連勝。雖然遲嚟嘅回勇幫唔到阿仙奴爭英超冠軍，但總算頂得住愛華頓，穩守第4位。餘下仲有兩輪比賽，阿仙奴領先緊愛華頓4分，贏多場就攞到歐聯資格。
不過，雲格賽後就唔多開心，明明隊波前半季排緊榜首，好有機會攞冠軍，點知3月接連失分，被踢出爭冠行列，繼續年年爭第4，穩定地無緣英超冠軍；雲格慨嘆：「贏多場就前4，證明我哋呢幾年嘅成績穩定，但呢個唔應該係我哋嘅目標，我哋要更好呀！今季我諗我哋至少17次坐聯賽榜首，但喺爭標嘅重要關頭，我哋總係好多球員受傷。禾確特、韋舒亞、艾朗藍斯、奧斯爾同哥斯尼幾乎同時喺季中受傷，少一兩個都仲可以，但4至5個咁缺陣，真係冇計！」
雲格又話下季贏冠軍
其實傷兵多、陣容深度不足都係阿仙奴近季經常發生嘅事，雲格亦唔係第一次抱怨。我求大俠心諗，一兩季多傷兵可能係行衰運，但10季都係因為多傷兵而冇聯賽冠軍，季初踢死幾個主力、1月永遠唔肯增兵，雲格係咪都應該有責任呢？而佢老人家見前4穩陣，又再誇下海口：「外界已經睇到阿仙奴嘅潛力，我哋可以做得更好，希望下季可以收穫更多。我相信阿仙奴可以攞冠軍。」
雖然呢番話聽到厭，好似季季都聽過，但我求大俠都希望阿仙奴可以離開呢個年年爭第4嘅無間地獄，等雲格拎多次英超先退休。
