中原今年首季仍有花紅派，後勤約400人瓜分300萬元，一般員工獲發0.35個月，主任級或以上就有0.53個月，對比去年第四季，分別0.55個月同0.83個月，花紅明顯縮水三成幾。不過有份拎花紅嘅後勤員工已經拍晒手掌，話現時市況咁差，有花紅已經好好，唔計多與少㗎嘞。
中原地產亞太區住宅部總裁陳永傑話，公司向來按照「有盈利，有花紅」嘅制度派花紅，住宅部首季佣金錄得超過5億元，較去年第四季減少17%，首季盈利減少，花紅咪少咗囉，但咁嘅市況下，有盈利已經開心啦！佢又伺機呻兩句，指自己冇份拎花紅，與一眾跑前線嘅代理一樣靠佣金收入，今次只係後勤約400人可以瓜分300萬元。至於美聯物業（1200）有冇花紅派呢？回覆係「暫時未有安排」。