恒指在最後一個鐘怒挾，情況就似有人話畀我聽「前度」乜乜乜時的反應：關我咩事？加入清倉行列後，騰出時間諗吓點執靚自己。選購化妝、護膚品時，姊妹可能會望一望吓佢啲成份啱唔啱自己，「炒鬼」如Samantha通常都會望多一樣嘢，就是最大老闆究竟係邊個，呢個化妝品集團值唔值得我畀咁多錢嚟買？就以韓劇《星星》為例，劇中有露過面的IOPE BB面霜，Laneige唇膏定係Hanyul的鎮定膏，其實都嚟自同一個阿媽Amore Pacific。
LG生活健康在韓國僅排第二，摘冠就是Amore。這間成立近70年的公司或者香港人覺得陌生，不過講到雪花秀、Laneige、Etude House，以至啱啱登陸香港的Innisfree其實來自同一個老闆，名符其實是一間韓國版的L'Oréal。對於香港仔來說，要避開超人勢力範圍，唔畀錢佢賺，難！對於Amore來說，目標是擴大戰線，務求能夠服侍地球上每個年齡階層的女人，令閣下能夠欣然打開荷包，家陣要搵個冇買過Amore旗下品牌的港女都唔易。
「一網打盡」的策略令股價長期跑贏大市，公司對前景充滿信心，認為直至2020年複合增長率逾30%。財神爺當然是還看強國人，憑着龐大研究資金，研發出適合亞洲人膚質的產品，再配合韓劇氣勢，成熟的植入式推銷，Samantha相信股價再創高峯不是夢。
Samantha
本欄逢周三、五刊出