雀林高手處處有，隨時青出於藍。話說政務官協會上周六搞咗個麻雀王大賽，參賽者去到一間酒家，分咗八、九枱麻雀大作戰。八方聽聞，當日廣東牌、台灣牌同越南牌都無任歡迎，但絕對唔似賭神、賭俠咁要搞晉級賽咁高門檻，賽事只簡單規定，將各枱嘅贏家逐一比拼「戰績」（有參賽者話當然唔係打真金白銀喎），贏最多嗰個就係雀王。
獎品係旅行裝麻雀
據聞當日參加者中，唔少係老手，包括前高官劉吳惠蘭以同李淑儀等，但點知最終勝出嘅，竟然係個官場新丁；做過新民黨主席葉劉淑儀助理、入咗政府冇耐嘅商務及經濟發展局助理秘書長（工商）白雋彥，爆冷成為雀王，跌到一地眼鏡碎，成為近來官場佳話。而得獎者嘅禮物……燈、燈、燈、凳，就係小巧又精緻，畀大家喺世界各地都可以過吓手癮嘅旅行裝麻雀一副嘞！
但講到官場嘅真正雀王，唔少AO都首推孫明揚，事實上孫公為官時都話過，放假嘅減壓方法，就係瞓覺同埋打麻雀。有AO笑笑口話，孫公呢次唔參賽，話唔定係嫌佢哋太小學雞，覺得佢哋唔夠資格同佢爭住稱霸。