都教授金秀賢（圖）真係紅，連今夏嘅巴西世界盃都見到佢！皆因韓亞銀行力挺南韓足總，成為咗今夏世界盃嘅贊助商，而身為韓亞銀行代言人嘅金秀賢，最近就拍咗輯韓亞世盃廣告。如果韓亞可以好似GATSBY咁，喺世界盃時段洗版式賣廣告，咁一眾姊妹就有眼福喇。
雖然我仍然覺得日劇好睇過韓劇少少，但《星星》嘅威力真係大，飾演都教授嘅金秀賢更加紅到冇人唔識。對金秀賢有印象，係喺佢做《盜賊門》時，覺得佢大大隻隻得嚟又幾可愛。到咗《星星》，嘩！成熟咗嘅佢真係好正。講番佢喺韓亞嘅世盃廣告，都教授會現身球場，將足球同金融結合，為地球人解答同埋分析金融，而南韓巿民仲會感嘆：「都教授，你好博學呀！」實在搞笑。
其實，家陣呢支南韓國家隊，論實力同球員外形，點睇都唔夠02年嗰隊咁好，勉強得個寄誠庸叫做睇得又打得，不過，同南韓國隊嘅教練兼名宿洪明甫，仍然差幾班，所以，搵都教授嚟撐場，絕對係明智之舉。文：吾中
以女性角度看球星新聞，唔用眉筆用原子筆寫低球壇百態！