政府早前向各區區議會泵水25萬推廣《基本法》，被揭活動離不開「蛇齋餅糭」。八方噚日就參加油尖旺區議會用呢筆錢舉辦嘅「政制發展知多少」研討會，主辦單位無厘頭請極地探險家李樂詩做主講嘉賓，結果李樂詩大談科研經歷同中國地理歷史。
得威化餅 阿婆呻笨
有長者聽到瞓着咗，有婆婆向八方盡訴心中情，話其實為咗份現場送嘅禮物先捧場，「假如佢話呢度冇禮物派就走，費事聽，坐喺度好戇居啫，係咪？」
油尖旺區議會呢次搞研討會硬銷政改，大嗱嗱攞咗9萬蚊公帑分畀三個街坊會，但除研討會內容貨不對辦，連蛇齋餅糭亦唔合格，每個長者坐足兩粒鐘，完場都只係收到一包威化餅，難怪連阿婆都話「搵笨」，要八方幫佢哋出頭追究錢銀去向：「筆錢用唔晒啦，一包餅值幾錢？場地都係租兩個鐘。」
主辦機構之一的尖沙嘴街坊福利會仲孤寒，要長者要聽足兩場研討會先換到一個清潔包，激到婆婆發嬲話下次唔嚟嘞，「聽佢發噏瘋，嘥氣！」福利會理事長蘇仲平唔答啲錢點使。政府新聞處竟然夠膽出稿話活動加深居民對政制發展認識，參加者踴躍提問同發表意見喎。