九龍倉（004）主席吳光正向公司執行董事豪派花紅，「老臣子」吳天海與曾經係壹傳媒（282）副主席嘅周安橋分別獲派2,000萬元花紅，令年薪總額大幅增加，周安橋直情係加薪1.5倍，執董之中加幅最大。
63歲嘅周安橋曾經係壹傳媒副主席，做咗三年零八個月，早於2002年底離職，當時佢話打算返內地搞地產生意，幾年後就走咗去幫吳光正打理內地生意。佢2006年加盟九倉專責內地地產，2011年7月升任九倉董事兼副主席。
根據九倉最新年報，周安橋舊年年薪總額2,518萬元，較前年增加1.5倍，主要因為獲發2,000萬元非硬性花紅，佢前年只獲發500萬元花紅。身在美國嘅周安橋對於年薪大幅增加笑而不語，估計因為九倉前年業績好所致。九倉前年核心盈利確係創紀錄，賺逾110億元。
吳天海年薪2,615萬
身兼九倉副主席與常務董事嘅吳天海舊年亦袋走2,000萬元花紅，年薪總額2,615萬元，增71%。吳光正當然袋走最多花紅，獲發2,600萬元，總年薪3,944萬元，升71%。
翻查九倉過去五年年報，吳光正向執行董事派花紅唔算鬆手，通常只得幾百萬元，佢自己2010年最多獲發1,600萬元花紅，之後兩年分別都係1,100萬元，吳天海之前兩年各得1,000萬元，所以話呢，吳光正舊年真係好豪爽，最爽當然係袋嗰位喇。
李華華
mailto:[email protected]