星期日西甲巴塞隆拿作客維拉利爾，一度落後到0:2情況下，喺最後半個鐘頭比賽大反擊，靠對手連擺兩次烏龍加埋美斯建功，以3:2逆轉，繼續落後榜首馬德里體育會4分。呢場波另一精采鏡頭，係有球迷帶種族歧視意思咁將條蕉掟落場，準備去開角球嘅巴塞守將丹尼爾夠晒高EQ，執起條蕉食咗佢。反歧視，可以好easy。丹尼爾仲因為咁高招，獲各界力撐㖭！
美斯絕殺助巴塞贏3:2
巴塞喺今季面臨3大皆空，佢哋剩番唯一可以爭逐嘅西甲，近期表現都係危危乎；繼之前一輪反勝畢爾包後，周日作客維拉利爾一樣要踢逆境波，今次又係靠美斯絕殺，喺83分鐘建功幫巴塞以3:2險勝。同日榜首馬體會作客華倫西亞以1:0小勝，巴塞𠵱家仍然落後佢哋4分，要保爭標希望，就求神拜佛馬體會唔好喺之後兩場聯賽贏晒，否則到煞科戰主場鬥馬體會就變成例行公事。
呢個世界咩人都有，總係有一啲人眼光狹窄，容不下唔同種族嘅人，做一啲傷害他人嘅言行。好似早兩日NBA快艇班主史達寧被揭發講一啲歧視黑人言論，惹嚟全城公憤；不得不承認喺足球場上亦有好多呢啲事情發生，掟蕉落場上侮辱黑人球員就係其中常見唔要得嘅行為。
喺比賽進行到75分鐘，丹尼爾準備去開角球嘅時候，發現有條蕉掟咗喺佢附近，呢位巴西國腳冇發嬲，反而執起剝皮吞咗佢。話晒蕉含有豐富鉀元素，對補充能量有幫助，丹尼爾話食得唔好嘥，你班友咪喺場邊繼續扮馬騮、猩猩叫囉，冇你咁好氣。
丹尼爾：當係笑話
丹尼爾賽後話：「我一早慣晒咯，我嚟咗西班牙11年，經常發生呢種事。要去改變好難，所以最好應付方法係當係笑話，如果我哋無視呢啲醜陋行為，佢哋就唔可以得逞。」
巴塞喺聯賽仲吊緊命，不過據講球會點都會喺季後易帥；前巴塞球員安歷基同埋現任畢爾包主帥華維迪都係球會有意招攬嘅人選。
悼念維帥
今場比賽亦係前任主帥維蘭路華（Tito）日前不幸離世之後，巴塞嘅首場比賽，賽前全場所有人都為Tito默哀1分鐘。唔少巴塞球員都好感觸，其中布斯基斯亦忍唔住喊；而恩尼斯達賽後就話，今仗可以反敗為勝相當別具意義：「維蘭路華啱啱離世，對我哋嚟講係非常艱難，今仗反勝對手，仲有乜嘢更好紀念佢嘅方式呢？」