WhatsApp皇者地位雖仍穩如泰山，不過LINE都的確越來越紅。噚日LINE仲喺希慎廣場搞咗個大型展覽，單係啲賣萌大型公仔已吸到唔少人影相；仲加埋場內間pop-up store，成間舖都係正版LINE Friends嘅product，少女好難唔心動。聽講於人流管制下，行完10分鐘後放低兩三張1,000蚊紙嘅大有人在。
LINE吸金力的確勁，去年收入達5億美元，最賺錢當然係In-App purchase。至於WhatsApp，市場預計年收入係2,000萬美元，而微信雖冇公佈具體數據，但表示上年第四季收入介乎3,200萬至4,800萬美元。論收入，LINE的確贏幾條街，特別係日本、泰國、台灣亦有好強市佔率。但講到香港，LINE嘅卡通的確紅透半邊天，然而根據LINE上年8月數據，賣公仔只佔公司整體收入兩成，主業仍係手機App，所以單係紅卡通係冇用嘅。LINE一定要諗計，將呢班卡通fans轉移去App到，咁樣推廣費先用得其所。
菲菲仲有個問題係，WhatsApp同微信都相繼公佈每月活躍用戶人數（MOU），分別達5億及3.55億。偏偏只得LINE唔肯披露，只係話全球登記用戶破4億。
LINE冇上市，唔披露係奈佢唔何，但當對手都高透明度時，好多人就會有以下解讀：只要佢一日唔公佈，即係唔係好多人日日用。
Fifi
本欄逢周二、四刊出