老虎活士由當初偷食俾「老虎乸」艾蓮發現兼以高球桿「家法侍候」後，仲搞到要離婚，艾蓮甚至連隻訂婚戒指都攞咗去拍賣；相信大家都冇諗過，「再見亦是朋友」都可以出現喺兩位身上！更令人意外嘅係，活士同「滑雪女王」禾恩打得火熱，艾蓮就搭上億萬富豪奇連（Chris Cline），佢哋各自各精采嘅同時，有傳仲會間唔中約埋出嚟玩「4人行」㖭！西方嘅前衞思想，傳統香港人梗係唔會明㗎喇。
富豪日理萬機，未必成日都得閒可以出嚟聚會，所以好多時都只係活士加上新歡舊愛嘅「3人行」。日前就有人影到，3位同場現身小型棒球比賽，支持活士同艾蓮嘅囝囝查理。據知情人士爆料，艾蓮識咗禾恩之後好鍾意佢，兩位仲變咗無所不談嘅好朋友㖭。記得當初兩女曾經隔空互罵，𠵱家竟然180度轉軚，所以話，女人真係善變。