報載，環境局計劃提交立法建議，向立法會申請撥款5.36億元，在屯門環保園內興建廢電器及電子產品回收廠，每年可處理及循環再造三萬噸電器電子產物，於2016 /17年度啟用。這個回收廠並非新生事物，早在2011年，環境局已與業界諮詢，當時的邱騰華局長曾努力與電器界、電子業商討，業界又曾組織考察團到日本考察，指特區政府的投入不足，回收廠無補於事。那時候，回收廠的建造費估計係4億元。
講吓講吓，回收廠仲未動工，估計建造費已由4億上升到5.36億，即係增加咗34%，好彩未動工啫，否則咪又係超支？立法會未知道肯唔肯批准建造，如再有爭拗，議員、政府、業界再鬧多一兩年嘅話，回收廠建造費增加到一億美元都唔奇。
建造費、工程費超支，目前喺香港已成為常態，能夠不超預算完工，可算奇蹟。左丁山在馬場問過一位工程師點解，佢不假思索就話：「搵唔到工人係最大原因，好多工程都唔夠人，基建地盤經常缺人，工程點可以順利進行吖，缺人嘅直接效果就係加薪，加得兩加，工程費點可能唔上升？」建築材料費呢？根據《金融時報》啲商品資訊，因中國經濟數據宣佈得麻麻，PMI疲弱，令到國際嘅鐵礦砂、五金等價錢一係下跌，一係呆滯不前，只有本地建造工人工資不斷上升兼唔夠人開工，先至係大患。高鐵工程延誤又可以賴工人缺乏？工程師話：「高鐵工程延誤從我嘅消息聽番嚟，第一點係純屬不幸，價錢昂貴嘅鑽挖機俾黑雨浸壞咗，現代鑽挖機有好多電子／自動性操作零件，遇到大水浸就唔掂。點解防範唔到大水？聽講係地面去水渠，有瘀塞，去水不順，大量雨水在地面搵窿捐，向下流，在地下形成小水庫，算承建商唔好彩，但講出嚟一定會俾人鬧嘅。我聽到，如果遲多一個月落大黑雨，鑽挖機可能完成歷史任務㗎嘞，依家就杰咯。第二，西九總站地下埋藏嘅幾十年來在佐敦及大角嘴使用嘅各式各類喉管，多到數唔清，以前好多工程冇按照原來圖則辦事，與圖則不符，承建商挖到地下先知道死火，唯有見步行步，為避開現有喉管，不斷改圖，請咗工人都唔敢趕工住，一早就知道有延誤嘅啦，等機會宣告啫！」