經常喺交易廣場行走嘅中環人應該留意到，地標銅牛附近有一棟外型奇特嘅建築物，渣打香港呢個新嘅財富管理中心噚日開幕。雖然渣打低調處理，冇邀請傳媒採訪，但就有唔少巨頭主持開幕禮，包括剛升做大中華區兼香港行政總裁嘅洪丕正、渣打（2888）執董兼亞洲區行政總裁白承睿。
交易廣場業主置地喺2011年底開始重建富臨閣，渣打銀行翌年落實租用全幢大廈，作為財富管理中心。渣打發言人話，噚日只係soft opening，日後正式開張一定會叫齊傳媒到場，亦有導賞環節。
渣打呢個財富管理中心佔地超過4萬平方呎，地下同2樓做分行，5樓就畀私人銀行見客用，暫時有340個員工進駐，日後會有更多員工由中環渣打總行搬過去。