離開無綫向外闖，陳宇琛滿懷希望簽約香港電視，結果觸礁。電視夢碎，34歲有氣有力，他仍然會開玩笑說：「搵緊街瞓，睇吓邊條街好啲，冇咁污染。」其實陳宇琛早在6年前因為鍾意扮rock友收藏重金屬的手鏈，又曾在英國倫敦Kingston University讀建築設計，所以開設一人工作室設計首飾。如今演藝事業前景未明，未來他會集中火力，拓展首飾生意，希望為自己創出另一片天。
撰文：楊潔雯
陳宇琛（Sam）是陳奕迅在英國倫敦Kingston University建築設計系的師弟，也是石修的兒子，他遺傳了爸爸的演藝細胞，除了喜歡做戲，還懂得設計，無奈半年後會跟香港電視的賓主關係，他只好另闢新道，全程投入發展自家品牌LLazy Bonez首飾生意。陳宇琛日前說：「好彩自己可以集中番喺自己嘅生意上面，以往唔係咁多時間放喺呢度，因為多數時間係拍嘢，我開始咗呢個首飾品牌6年，08年開始一路keep住做，只不過冇精力放落去搞大啲，嗰陣一心諗住點樣拍戲，𠵱家會擺番多啲時間喺公司度，無論喺設計上，自己個網站，好多嘢都要重整過，𠵱家都需要搵朋友去幫手。」
玩搖滾風
過往6年，都是無心插柳，為興趣建立自己品牌的陳宇琛，詳述他的設計之路：「每一件都係我自己design，吊墜、手鏈、頸鏈呀！每一樣都係自己擺心機落去設計，生意都係慢慢去進化，開頭點解會開始呢樣嘢，係因為自己鍾意首飾，又一路有收藏，咁不如自己設計吓喇！橫掂自己都識設計，設計完試吓做一件出來，又好似幾過癮喎，睇吓賣唔賣到，有冇人鍾意呀？慢慢就演變咗今日呢個品牌。」
本來是興趣，要變做一盤生意，不是想像般容易，陳宇琛說：「一路好自我，點樣可以吸納多啲客要慢慢組織吓，我喜歡比較哥德式嘅嘢，比較重口味啲，比較heavy metal、punk rock，個style好多客都鍾意，但佢可能carry唔到個設計，唔係個個rock友咁走出嚟，咁我盡量要調校。」
陳宇琛特別着重男士首飾設計，最近開始注入更多新元素，他說：「開始引入第二啲物料，一個銀器，可能用一啲南洋珠，有啲可以鑲石，呢啲會將件物品，令佢大啲對比，同埋多啲顏色吸引，冇咁悶，其實男仔都可以戴珍珠，有啲人會話pearl係女仔，所以𠵱家focus喺用珍珠點樣可以中性化啲，當然唔係用普通白色pearl，男仔難carry啲，黑色灰色男仔可以，設計上可以配合。」
全力以赴
轉戰設計首飾行業，陳宇琛對未來不敢抱太大期望，他說：「呢一刻都冇承諾㗎！冇嘢係一定，香港電視，都全力以赴去做，你點知outcome，現實就係現實囉！起碼你叫做咗，冇話hea住來做，好用心，呢樣嘢對我嚟講都係一個機會，真係有落心機去做，好過你睇吓點喇、求其喇！」
