六四未過、七一未到，咁快就佔領中環？一班中環金融人噚晚收工後，冇去clubbing摸杯底，反而走去德己立街提早和平佔「中」，派發向中共提出「十訴求」傳單，呼籲參加下月6日第三輪全民商討日。唔少賓架、芬佬都獻出第一次「企街」，好似對沖基金營運總裁陳漢輝、國際投資銀行副總裁沈小姐，佢哋甘願紆尊降貴，無非都係想北京畀條民主路香港人行吓，希望喚醒中環友支持真普選、捍衞香港核心價值。
金融界要發聲
今次提早佔中搞手，就係俾中共喉舌《環球時報》批評「挾洋自重」嘅資深對沖基金經理錢志健（Edward）。佢話過去兩年香港變咗好多，尤其言論自由方面，「作為一個金融人，唔可以淨係睇CNBC、彭博通訊，要聽唔同聲音」。但香港已經去到一個臨界點，就係要同政府一個主旋律，唔可以有任何批判聲音。所以金融界更加要發聲，俾中央知道唔要篩選，要真普選。
70名金融界人士早前發表公開信畀國家主席習近平，提出10點訴求，要求落實一國兩制、停止干預等。
Edward話今次係佔中行動第一次喺蘭桂坊擺街站，唔少中環人主動接傳單，又簽名支持商討日。最後佢哋喺街頭點起燭光，合唱《Do you hear the people sing》，和平結束提早佔中行動。
mailto:[email protected]