上星期嘅傳媒高層訪京團，一眾高層冇交代過佢哋見領導人時有乜嘢提問，被人恥笑做咗傳聲筒，枉為傳媒代表。噚日團長李祖澤（圖）以報業公會會長身份，出席報業公會新聞獎頒獎禮，八方梗係捉住佢問清楚啦！
呀會長話，同李源潮等領導人交流會面，點會冇問問題？訪京團由三個傳媒組織組成，有晒共識圍繞四個方面提問，包括中國經濟發展、中國官場貪腐情況、香港政制改革，同埋近日火頭正旺嘅中港矛盾，不過就冇特別評論自由行係咪要取消。
而談論過程當中，梗係有追問喎，「話我哋係傳聲筒，呢個講法太武斷！」咁做乜唔一早交代清楚？李會長話，因為當時記者只係問「領導人講咗啲乜」喎。