貴價茶餐廳翠華（1314）今年初以月租過百萬元，租用富臨飯店阿一鮑魚喺銅鑼灣個巨舖，新近又以月租約42萬元，租咗旺角豉油街60至104B號地下9至10號，呢個舖建築面積3,060方呎，前租客係標記樂園茶餐廳，月租只係19.5萬元，換言之翠華加租一倍都肯制。
土地註冊處資料顯示，上述舖位由「Yau Luen Stevedoring Transportation Packers Company Limited」於1988年以930萬元買入，公司股東包括梁嘉林、蔡克剛同徐伯鳴，其中，蔡克剛與生產忍者龜聞名嘅「玩具博士」陸宗霖女婿、專責處理遺產案件嘅律師蔡克剛同名。
以新租金計算，租金回報率高達54%。代理指，相比同區舖租，例如通菜街食肆平均呎租約70元，而最多食肆聚集嘅花園街，人流多，平均呎租約200元，翠華呢個舖位平均呎租137元屬市價。