碌卡消費，「既方便又快捷」，又可賺取積分同獎賞優惠，甚至環遊世界都冇問題！美國博客Daraius Dubash，過去幾年同老婆遊覽三十幾個國家，坐頭等、入住五星級酒店外，大部份旅費佢都係選擇由信用卡積分包底。呢位「巴打」仲開埋blog，公開儲信用卡積分嘅六大攻略。
Daraius Dubash喺《Million Mile Secrets》網誌話，起初碌卡多數只着眼小優惠，例如超市同油站等嘅消費回贈。四年前，佢睇過一篇網誌教人點用3,200蚊環遊世界後，發現如果識得運用信用卡嘅積分，一樣可以嘆世界。佢試過以六萬點Starwood積分，入住澳洲道格拉斯港嘅Sheraton酒店七日六夜。
Dubash話首先各位可以吼準各大航空公司推出的聯營信用卡，仲要「有大食大」，飛行里數優惠最好有10萬分或以上。因為里數太少，令旅遊目的地選擇受限制。佢仲話呢類優惠常見於新客戶。第二就係要「目標非常清晰」。Dubash話自己持有18張信用卡，但清楚知道每張信用卡嘅不同優惠。佢仲會定期留意銀行網頁最新優惠。另外，大家要將月結單存好，準時找數。當然用家儲積分時亦唔好得意忘形碌爆卡，以免失預算。
而新手上路嘅「儲分達人」，唔好申請多過兩張信用卡。最後，Dubash亦提醒大家唔好預設過高要求，應以合適自己旅程為先。
C+B
本欄逢周一刊出