梁詠琪（GiGi）、古天樂、楊千嬅同蔡潔，噚日喺荃灣宣傳新戲《香港仔》，同現場fans齊齊扮戲中角色，有細路女扮古仔戲入面個女，但古仔笑個細路女似扮紙公仔多啲。
「要避孕兩個月」
講開小朋友，GiGi同西班牙籍老公Sergio都好努力造人，但最近因為肩周炎脊椎彎咗，加上盆骨歪，驚影響生仔，醫生要佢先醫好脊骨，GiGi話：「要避孕兩個月，一心迎接（造人），本來開行油，𠵱家要煞掣。同老公聽到都呆咗，只好聽天由命。」
對於商務及經濟發展局局長蘇錦樑，講內地小孩喺街便溺嘅「包容論」，做咗媽咪嘅千嬅同囝囝出街會點處理？佢話：「通常之前屙清先，食餐飯好短時間，好少要去洗手間。我識嘅內地朋友好少會咁，可能只係個別事件，而且喺街咁樣唔係咁方便。不過應該有多啲指引方便大家。正如當日我話餵人奶，商場好少地方可以餵到，多啲指引會好啲。」
