噚日沙田馬場有好幾位財經名人出現，最開心當然係首次以個人馬主身份拉頭馬嘅麗新系執行董事周福安喇，周福安與太太隻「福駿寶」上季開始落場，成績一般，最叻都係跑第二，噚日喺第一場終於開齋跑第一，周福安與周太齊齊拉頭馬。
周福安老闆林建岳與前經濟發展及勞工局局長葉澍堃亦有隻馬「跑寶貝跑」落場跑第七場，可惜隻馬仔唔多聽話，跑包尾。不過，輸馬只係區區小事，應該唔會影響佢哋嘅心情，尤其係葉澍堃啱啱先至抱孫，榮升做爺爺；岳少就嫁女。
黃志祥四駒出賽
另外，信置（083）老闆黃志祥、金管局前總裁任志剛與中信泰富（267）前主席榮智健都有現身。黃志祥連同太太、仔女名下嘅馬，全日有4匹馬出賽，包括「勁利多」、「富利多」、「健利多」同埋「信利多」，但全部表現欠佳，黃老闆噚日冇機會拉頭馬。榮智健上月有隻「飛影」跑出，令佢同老友任志剛一齊喺凱旋門影相，另一隻「飛龍」噚日被安排今季第4度出賽，可惜表現差少少。
