財爺曾俊華噚日個網誌內容回歸平淡，唔似上期不點名回應喺立法會被人掟陰司紙單嘢咁有火藥味。佢上周三到訪亞洲國際博覽館，就喺網誌爆咗亞博廚師嘅蒸魚秘技。
亞洲博覽館除咗舉行展覽同大型演唱會，近年都利用地方大呢個優勢拓展宴會生意，場地可舉行360圍、5,000人嘅大型中式宴會，唔少企業鍾意喺嗰度搞周年晚宴。財爺爆料話，為保證食物質素，亞博嘅大廚做咗唔少研究，蒸魚係對廚房最大嘅考驗。亞博嘅廚房可以同時蒸180條魚，所以喺360圍嘅宴會中，有180圍會先上魚，另外180圍先上雞。
由於場地大，侍應從廚房將魚送到最遠嗰一圍，需要幾分鐘時間，為咗保持上枱時嘅最佳溫度，送餐嘅器皿須有保溫功能。但係另一個問題就會出現嘞，當侍應到達最遠一圍時，魚已經太老。
經過反覆測試，亞博嘅廚師竟然計算出每一圍與廚房嘅距離，調較每一圍嘅蒸魚時間，再喺場地設立中途站，等侍應喺適當時間加入葱絲熟油等配料，確保每一條魚以最佳狀況上枱。咁大家下次去亞博食魚真係要試真啲喇。