馬雲旗下阿里巴巴可謂無孔不入，就連台灣藝人徐熙媛（大S）奶奶張蘭創辦嘅內地飲食集團俏江南，都可以同阿里拉上關係。俏江南獲「紅籌之父」梁伯韜旗下私募基金CVC入股後，話計劃緊同阿里旗下「淘點點」合作發展O2O（Online to Offline）嘅新生意模式。
梁伯韜入股俏江南
市場舊年底傳過，CVC以23.4億元買入俏江南69%股權，張蘭持有餘下約三成股權，張蘭曾否認賣股，但不認還需認，CVC噚日宣佈，完成入股俏江南，成為大股東，但冇披露細節。
CVC指交易後，張蘭仍然係俏江南主席兼其中一名股東，即係唔會退休走去幫大S湊孫。俏江南除繼續喺內地開分店之外，仲諗緊外賣、宴會等新方向，仲計劃跟淘點點合作搞O2O。講到底，CVC係想湊大呢盤生意再拎去上市獲利，梁伯韜最叻做刁，睇佢今次點表演。