去過西班牙巴塞隆拿旅行嘅人，相信都一定去過起咗百幾年都起唔完嘅聖家堂La Sagrada Fam莜lia「潮」聖過，而好多人都係俾「永遠起唔完」呢個賣點吸引。但查實點解呢座安東尼．高第（Antoni Gaudi）大師嘅傑作，咁耐都埋唔到尾呢？身為聖家堂第五代建築師嘅Jordi Fauli近日嚟咗香港，親自解開呢個謎底。
聖家堂喺1882年開始興建，隔年由有建築鬼才之稱嘅Gaudi接手，佢將原設計改為哥德式同曲線組成，最終動工距今132年，竟然都未完工。Jordi Fauli噚日出席港大建築系嘅講座時，講咗幾大原因。
佢話聖家堂嘅設計為不規則拋物線形狀，以當年建築技術嚟講，工程算係超級困難，點似得𠵱家乜嘢都可以用電腦搞掂？而Gaudi喺1926年過身，亦影響咗個工程進度。其後西班牙更經歷內戰，好多設計草圖喺期間被銷毀，後嚟要搵番重組都用咗好多時間㗎。
電腦嘅出現，令屬參數式設計聖家堂嘅興建速度加快，Jordi Fauli舉例指，一部電腦切割機已經令工程暢順好多。佢估計2026年聖家堂真係可以完工，順道紀念Gaudi逝世100周年。首度嚟港嘅Jordi Fauli仲話，香港嘅樓一支支咁好密集，令人覺得十分有活力㖭呀。
mailto:[email protected]