朋友創業不久，刀仔鋸樹有點成績，下一步想把產品做深一點。做深要人，人手不夠，要請，但請人要錢。這刻的利潤不夠請足夠人，於是找天使投資。天使說，項目有趣，當有正式付錢的客人，就有興趣投資。問題是，要有錢先請到人先開發新產品先會有客人，無投資點先有客人？
這類雞先蛋先情況，鬼佬叫Catch-22，也可叫loop死咗，反正就是好似跌落個死胡同無逃生門。創業路上，這類難題，一個又一個。例如，找投資者常見現象，甲會話有興趣，但首先要有人帶頭，就跟，乙又這樣說，丙又這樣說，於是幾個人有興趣，但人人都等人帶頭，點搞？
要善用手上本錢
又例如，你整個交易平台網站，有賣家先吸引到買家，但又要有買家先吸引到賣家，一開始，兩邊都無人，點搞？
雞先蛋先難題，大概是創辦人遇到最棘手的一類問題，也正正是創辦人最需要解決到的一類問題。這麼多人懂得寫程式，點解不見個個去自己搞Startup？這麼多人搞Startup，點解這麼少人成功？關鍵是，解決雞先蛋先情況，太難，不是知識也不是技術問題，更似是街頭生存智慧一類的問題。因為太難，所以一旦衝得過，就好着數，輪到後面的人卡住了。
要解決，起碼有兩種方向。一，是好聰明地善用手上有的本錢，減低一件事對另一件事的依賴。例如無錢開發的問題，兩個創辦人，不出糧，兩對手，點樣用先整到似層層？這關係到一個常講的貼士，就是把範圍收窄，窄到好少本錢都做到些成績。照觀察，我估，最識用本錢的人，比起一般水平的，效果可以差倍數。
二，是令有關人等偏向樂觀，甚至過份樂觀。創辦人有個優勢，就是掌握最多資訊，如果懂適度按摩資訊，可以同時令想請的人覺得會有資金，令傾緊的投資者覺得會有大客，令大客覺得會有產品出爐，然後大家都以最樂觀的眼光一齊踏出一步，再加點運氣，確實可以變成自我預言，衝出死胡同。
主場新聞博客姚崢嶸今期（75回）的奇文共賞，其中一篇來自《Wired》的，就是講矽谷兩個三十歲Startup創辦人，公司燒剩只夠出一個月糧的錢，扭緊個產品又未有但上緊新顧客之時，有驚無險最後一分鐘衝破雞先蛋先難關，找到資金續命。真人真事，好詳盡，奇文值得一賞。
宋漢生