有啲嘢，叫做自我感覺良好，但可能同事實冇關。曼聯有班「7小福」，其實從來冇7個人，數來數去得6個，夾硬要塞第7個係基利士比又或者泰利曲基，都唔係大家熟識嘅「費格遜bb」；但為咗順口，照講。
前排話7小福夾錢買曼聯，球迷們開心到暈，因為對號入座－「曼聯人買曼聯」，就如「香港人用香港貨」一樣咁親切地道，warm到痹；點不知睇清楚，原來佢哋只係想夾份買隊非聯賽球隊玩。但家陣應該唔使買沙福特嘞，因為傑斯暫時坐正，仲大叫一聲就call番其餘3位師兄弟歸位；記者會上傑斯仔風騷到暈，曼迷們歡送莫耶斯亦開心過人，似乎最期待的畫面終於出現了。只不過傑斯技術雖然超人，但當年做隊長都好似遊魂，佢除咗資歷最深，有邊瓣似係可以做到好領隊呢？做費Sir嘅傳話筒呢，就或者合格有餘嘅。
費Sir當年之所以勁，乃係因為佢份人有黑白兩面；咬住香口膠嘅紅卜卜臉、「笑口噬噬」嘅白臉固然受大家歡迎，亦可以話係人都模仿到；親善大使碧咸夠叻啦，但究竟有邊個可以做到佢黑面神嘅燶樣，鎮壓全場吖？費Sir大概心裏有數，只有一個做得到，就係單字一個堅……尼！師徒兩個臨尾反面，可能係費Sir心底最大的痛；若果當年堅尼唔係成日功高蓋主，家陣好好哋，咪可以交棒囉！
每間學校好好老師何其多，最難搵嘅永遠係訓導主任；堅尼師承白賴仁哥洛夫以及費Sir，其鐵石心腸正正係根治曼聯班少爺兵嘅良藥。「傑斯 & friends」？玩就得，打仗就難嘞。若果傑斯係風流波，堅尼就係士氣波！堅尼講過，佢每次踢波嘅動力，並唔係女人、唔係名利，係恐懼，恐懼失敗令佢不斷前進。跌落低谷嘅曼聯要走出深淵，要明白有時恐懼比起獎賞，係更強嘅動力。
堅尼返曼聯不是夢，搵雲高爾過吓冷河先，然後畀堅尼慢慢坐正，費Sir應該接受到嘅。畢竟徒弟之中，堅尼最似佢咁無情。
KEYMAN
now TV主持