【本報訊】「我同市民發聲，冇問題㗎，再敏感我都夠膽做！」有「時事飄色王」之稱的黃成就，說話比任何高官、政客更有「吉士」。他近年為長洲飄色巡遊加入政治元素，引得市民拍案叫絕，只是歡樂時間過得特別快，這位島上唯一的飄色師傅，下周二（5月6日）太平清醮「重頭戲」飄色會景巡遊後將正式退休。
記者：潘婉玲
「叮！叮！叮！」每年太平清醮前夕，長洲新北社街某角落，從早到晚便傳來這些聲音，一位頭髮花白的老人，拿着鐵鎚用力地打着，體力猶勝不少後生仔，丁點看不出已年屆七旬。「最近失眠呀，好多嘢諗，諗主題、諗道具！」黃成就四肢發達，頭腦卻絕不簡單，身為長洲唯一飄色師傅，大家會叫他黃師傅、就哥，但傳媒更愛叫他「時事飄色王」。「係你哋《蘋果》改嘅，之後個個都跟住叫！」
諷貪湯餅被消失 嬲到玩多一年
幾年前開始，黃師傅為飄色加入政治元素，例如去年的「吾湯唔水」，諷刺湯顯明向內地官員送禮，做戲做全套，黃師傅原打算，由色芯（飄色上表演的小童）向在場中聯辦官員送上曲奇，誰知巡遊當天，曲奇離奇消失，「第二日又出現番，仲多咗一罐！」此役氣得原定去年退休的黃師傅要多玩一年，「上面高官食高薪，做到官逼民反！我同街坊市民發聲，冇問題㗎，再敏感我都夠膽做！」難道就不怕得罪人，被「請飲茶」？「茶我日日都飲，但唔係嗰啲，都冇得罪人，冇指名道姓喎！」言下之意，只是小器者愛對號入座。
代表作還有2010年的「廿蚊張」，寸爆飲食界立法會議員張宇人，提出最低工資時薪20元，一矢中的，只因身受其害，2006年，黃師傅到港島當商廈通宵看更，每天工作12小時，月薪才4,000多元，「你講到乞兒咁，畀廿蚊一個鐘，當堂諗到呢個（主題）」。
黃家三代打鐵，包辦飄色支架逾90載，黃師傅13歲入行，除學打鐵，亦協助製作支架，「試過一日搵幾千蚊，當時一層樓都係十幾廿萬！」八十年代末，打鐵業步向夕陽，老師傅步出長洲，當過地盤工、東區醫院維修工，2003年食肥雞餐，獲得廿多萬退休金，偶爾做義工過日辰。與鐵鎚、鐵枝相戀超過半世紀，一旦退休，往後的飄色巡遊，街坊只能沿用舊支架，「手功好嘅，仲可以用20、30年嘅！」
豬肉佬可以喝Dry Martini，打鐵的也可戴勞力士，「嘻，幾萬蚊啦，唔係好記得喇！驚唔驚整花？戴得就唔驚花啦！」要請得動黃師傅，講心也要講金，「我哋長洲人講利是，冇話幾多錢，總之，一盅兩件、同埋下午茶， 一年都食唔晒！」