泡菜仔喺中港台咁受歡迎，內地唔少廣告同商演都搵晒泡菜仔女嚟做，趕絕晒中港台明星搵銀機會，而且每次佢哋嚟都要包機同私人保安，要求多多。關仁呢兩日去咗泡菜國，約咗某大經理人公司要員飲咖啡，同佢講起泡菜明星架子越嚟越大，佢解釋話佢哋去內地要求包機同保安係事出有因㗎！
網上公開相片
好似「白兔」有次去北京拍廣告，當時以為冇人知，佢只係坐商務艙，點知內地粉絲搭飛機去泡菜國，然後同佢同班機，仲坐埋商務艙，然後係咁偷影佢，當時佢啱啱拍完套劇去內地做嘢，仲係好攰，所以上到機唔理咁多，大字形咁瞓，但班內地粉絲係咁偷影，然後放晒上網，瞓覺咁私隱嘅事俾人公開晒，搞到佢鬼咁唔開心，所以以後去內地，經理人公司就有呢啲要求。
我哋香港嘅「勤力王」每次返內地都要求包機，聽講因為有同樣遭遇，不過勤力王瞓覺前已發現有粉絲監視，所以唔敢瞓，但就周身唔舒服，覺得好受騷擾。
撰文：關仁