【本報訊】今年長洲飄色主題，黃師傅繼續寸爆高官之餘，亦搞搞新意思，結合現今大熱韓風，名為「來自星星的守財奴」，寸爆財爺曾俊華不派糖。「派都派到鬼死咁肉酸，中產一啲受惠都冇， 庫房已經水浸！」飄色王每天看幾份報紙，也看韓劇？「咩星星，我都冇睇過，都唔知乜頭乜路，係啲仔女畀意見我！我就話曾俊華係來自外星，唔知地球發生乜嘢事！」連道具也用上韓國護膚品、酒樽等。「古裝邊個識睇，落後啦！」別看他年屆七旬，思想卻潮得很。
去年，黃師傅退休消息傳出後，竟比過往更忙，「個個搵我，驚我唔做，連啲仔女都勸我唔好啦，話我身體咁好，做得咪幫吓街坊手囉！」惟訪問後兩天，黃師傅工作期間突感心絞痛，由直升機送往東區醫院，留院兩天，「醫生話我太攰，唉！呢排每晚瞓得三、四個鐘！」
黃師傅收山，長洲中興街值理會主席梁國明感到不捨，「唔係好想，但冇辦法！我哋𠵱家有十幾支鐵（架），或者可以買現成返嚟焊接，但係彎位、弧度始終冇人手屈得咁好！」