梁洛施與詹瑞文合演的舞台劇《快樂勿語》，Bella飾演一位弱聽的女仔，不愛說話，今次要學手語及唱主題曲，她坦言挑戰甚大。詹瑞文表示劇中與Bella角色相反，是個說話多到煩的教授，他稱當初找Bella演出時，仍未有這個故事，他說：「其實我同佢冇聯絡㗎，舊年12月我去加拿大演出，之前聽阿Sa（蔡卓妍）講約過佢食飯，我咪試吓搵佢，點知一傾就四粒鐘，之後再搵佢做戲，其實Bella接戲一定要有完整劇本，但今次佢對我好信任，我被喻為呢個劇場嘅王家衛，有時邊排邊創作。」
超凡演藝細胞
談到Bella十年前後的轉變，詹瑞文說：「好多方面有進步，有幾多個25歲嘅女仔經歷咁多人生階段，呢個係佢嘅選擇，亦係佢得到嘅一啲好寶貴嘅嘢，包括佢小朋友，佢生活嘅選擇，我戥佢高興係10年前佢真係一嚿粉咁嚟上堂，10年後，佢對自己要嘅嘢好清晰，好勤力，頭先佢講對小朋友嘅教導係自律，佢自己都係個好自律嘅人，排戲好準時，決心好強嘅女性。」
詹瑞文指Bella的演藝細胞之前綵排時亦驗證了，Bella說：「嗰日詹Sir叫我玩即興，喺大家面前棟篤笑搞gag，佢叫我做5分鐘，我見佢冇嗌停，最終做咗半個鐘，我做咗馬騮，媽媽、小朋友、BB、妓女，黑社會大佬等角色，仲要用外星話嚟講，之後詹Sir打畀我話現場嘅同學都呆咗。」
