【廣州直擊】MK-Pop，現在人人首推天堂鳥和FAITH，賣點離不開跳舞甩拍子、半鹹淡韓式image，還有就是那種hea到爆的MV拍攝。但大家不要忘記，MK-Pop不只是香港獨有，還有一隊，那就是廣州的拾音社！
撰文：宋文、阿Gi
遭香港網民瘋傳的《Kiss Kiss Kiss》MV，有人覺得是視覺上的耐力挑戰，兩位成員的chok樣令人忍俊不禁、那part「無限Kissy kissy kissy再來兩輪kiss」的舞步，當然最重要的，就是夠MK！不知拾音社對MK一詞有何概念呢？
趁年輕反叛
日前拾音社在廣州接受訪問時說：「MK，旺角嘛，MK-Pop就係旺角流行音樂。」成員BC（何柏誠）這樣說。 答中一半啦，因為香港頒獎禮未有這個category。跟天堂鳥和FAITH這兩隊MK-Pop始祖齊名，拾音社兩子坦言沒想過，BC說：「自從有MK-Pop嘅潮流或片段，我哋知道『天堂鳥』同『FAITH』，都有聽過佢哋嘅歌，諗唔到《Kiss Kiss Kiss》呢首歌都會有咁大反應。」香港現在有誰不知如何「kissy kissy」？他們又說不介意跟兩隊MK-Pop同台表演。
但說到底，MK也有一點點貶意，始終是形容一些不良少年，會否介意呢？「我覺得每個年輕人都有反叛時期，都曾經試過MK，所以唔緊要啦，可能大家覺得拾音社𠵱家好MK，咁就趁年輕MK一下。」看來兩人很清楚自己在做甚麼。
除了《Kiss Kiss Kiss》，就是另一首《菲士》，又是跳舞歌，拾音社會否定位在跳舞上？另一成員滔滔（李滔）說：「呢首歌有跳舞元素，但我哋唔係跳舞組合，係創作組合，千祈唔好拎跳舞來定義我哋！」
但一說起創作，就會想起網民對拾音社的批評，就是他們抄電音J-Pop，如Perfume、Kyary Pamyu Pamyu等，BC回應：「我覺得唔使刻意去證明，講真𠵱家抄襲定義好廣，我哋主修作曲，所以我哋好明白乜嘢叫抄襲，我哋唔認為係抄襲。」OK，創作呢家嘢，真係識條kiss咩！
「我像有錢仔？」
對於網民的「有錢仔論」，指拾音社有充裕資金做所謂的音樂，不用自己落手，兩人反擊，說編曲作詞都是自己思考：「好好笑，我似有錢仔？我戴嘅手錶你都戴緊，我着嘅衫你都會着，其實我認為咁樣唔關係到有冇錢，都係好努力做自己想做嘅事業。」
不要以為是平地一聲雷，拾音社這兩首歌曲，已經是他們第四張大碟收錄的歌曲， 但他們不想只是MK這麼簡單，他們希望向人證明到更多：「俾人鬧得越多，證明人哋睇好你，希望你做得更好，所以拾音社會努力嘅。」
【Kissy Kissy的背後】
是的，拾音社來自廣州沒錯，跳的是para para一般的舞，頭髮又金又綠，騎騎呢呢的，但其實同樣是24歲的BC和滔滔，都是音樂學院出身，受過純正音樂訓練，他們也說：「好想玩番嚴肅音樂！」
滔滔學了十多年鋼琴，孖着在讀學院時認識的BC，若在台上不是跳MK舞而是唱民謠，應會是另一番景象。「我哋第一張大碟，確係走民謠風格。」只是他們想，既然有機會，不妨試試不同的曲風，現在玩電音，下一次，可能就是唱國語歌了。
