【本報訊】去年超強颱風尤特和天兔在本港外圍掠過，在菲律賓造成逾6,000人死亡的超強颱風海燕也未影響香港，不少追風的港人都大呼失望。但為港台拍攝打風節目的編導伍自禎，去年走到天兔和海燕登陸之處，經歷採訪車被掉下的電纜打中，看見菲律賓城市如被海嘯蹂躪，屍橫遍野，直言若兩個風正面襲港，在尖沙嘴海旁追風的人定必喪命。
港台製作的《氣象萬千IV》將於今晚7時半，一連四個周六在港台31台及無綫翡翠台播放。伍自禎去年追風行動，正是拍攝首集「颱風駕臨」。
天兔去年9月下旬吹襲華南，天文台在22日下午發出8號風，最終它在香港以東的汕尾登陸，香港避過一劫。伍自禎與拍攝團體當日趕往汕尾拍攝天兔登陸，到一條村莊時，「唔夠五分鐘，電燈柱開始跌落嚟，電纜『啪』咗架車，直情撞凹咗」，幸未有受傷。他們將車停在村屋與村屋之間空隙，「嗰時啱啱登陸時間，所有雜物吹得好勁，我哋頭頂好多雜物係咁飛，好彩有個村民開門，叫我哋衝晒入佢屋企，逗留咗幾個鐘」。
海燕襲菲 屍橫遍野
另一世紀巨風海燕在11月吹襲菲律賓，伍自禎與隊員趕赴預測登陸的中部海邊城市塔克洛班。他們在市政府大樓的避災指揮中心，等候海燕到來，以為那處遠離海邊，又是石屎建築物，十分安全。翌日早上，「個風突然殺到，大樓啲窗逐個爆晒，風雨打入嚟，傢俬吹到亂晒，成個指揮中心變得溶溶爛爛。啲人避晒喺樓梯、廁所等冇窗地方」。
更驚嚇在風暴過後，「士兵見到遠處好似有人，冒險去抬返嚟，但已係屍體」。兩小時後他們出去拍攝滿目瘡痍的街道，「啲人好似好有默契，將屍體放上卡車」。
伍自禎表示，希望透過這集親身拍攝節目，展現颱風巨大殺傷力，希望市民不要抱着玩物心態去追風，「見到新聞話天兔打唔到嚟，大家失望到爆，我同攝影師面對面相對無言。以我哋現場感受到風力，喺尖沙嘴睇風嘅人，都返唔到嚟」。他居於村屋，整條村的格局如同塔克洛班市，如海燕正面吹襲，「成條村會同我現場見嘅一模一樣，係咪仲想海燕嚟呢？」