恭喜老爺，賀喜夫人！塞爾維亞網球手迪祖高域日前喺twitter宣佈靚女未婚妻列絲迪有喜，自己將會榮升老竇。目前喺希臘養緊傷兼度假嘅迪祖，之前已經宣佈有望趕及復出參加兩周後嘅馬德里大師賽，𠵱家可謂喜上加喜。咁高興，迪祖仲開心share咗一張兩口子嘅甜蜜合照畀大家睇吓。相中兩位深情對望，雖然大家都戴住副黑超，但相信佢哋眼神裏面嘅柔情蜜意足以穿透鏡片，我求大俠睇見都覺得sweet，仲有少少葡萄㖭。不過迪祖未有透露詳情，所以BB性別同預產期等等，暫時都係一個謎。而目前球季仲有3大滿貫法網、溫布頓同美網未打，唔知小迪祖嘅來臨會唔會影響爸爸嘅賽程安排呢。