【政治籌碼】
菲政府「偽道歉」實質「攞着數」，港人過去幾天看在眼裏大感不忿。謝志堅指當日三方會談後，特首梁振英宣佈撤銷黑色旅遊警示，他和其他死傷者家屬皆感愕然，「擺明個黑色旅遊警告係籌碼，我哋其實從來冇向政府要求應該除定唔應該除」。他批評港府未有核實當地是否安全便撤銷旅警。
謝志堅認為，當局應該從菲律賓現時的安全情況決定是否解除警示，「好突然，對方好似未真正去執行到一啲嘢，就即刻撤銷旅遊警示」。他指以過去三年和菲政府交手的經驗，「佢哋講完啲嘢可以完全唔算數，你就咁撤銷咗，佢講乜都得，佢反口都得，佢話唔記得咗有冇講Sorry都得啦」。
斥當局談判自我矮化
他批評港府在談判過程自我矮化，指道理完全在港方身上，但當局卻覺得無能為力，「俗啲講句，我要你跪喺度我都受得起，我已經唔係咁唔理性，你香港政府梗係要𡁻佢啦」。
他舉例指，當日三方會議後，港府未有要求菲方一起面對傳媒，「仲要初時只係招待菲律賓傳媒，成件事咪即係自說自話？佢要面對番香港人」。對於菲方邀請家屬到當地拜祭，謝認為「只係畀藉口佢去做場show」，但若不出席會顯得沒禮貌，現仍考慮中，至於會否到當地旅遊，他說，「唔夠膽講一定唔會去，但可見將來都唔會去。」
《蘋果》記者